കേരള ബ്ലാസ്റ്റേഴ്സിന് വീണ്ടും തിരിച്ചടി ; മാര്‍ക് സിഫ്‌നിയോസ് ക്ലബ്ബ് വിട്ടു
കൊച്ചി: കേരള ബ്ലാസ്‌റ്റേഴ്‌സിലെ സൂപ്പര്‍ താരം മാര്‍ക് സിഫ്‌നിയോസ് ക്ലബ്ബ് വിട്ടു. ഐഎസ്എല്ലില്‍ ബ്ലാസ്റ്റേഴ്സ് നിരയിലെ മികച്ച കളിക്കാരനായിരുന്നു സിഫ്‌നിയോസ്. ഈ സീസണില്‍ ടീമിനായി ആദ്യ ഗോള്‍ നേടിയ ഡച്ച് താരം പിന്നീട് 12 കളികളില്‍ നിന്നും നാല് ഗോളുകള്‍ സ്വന്തമാക്കിയിരുന്നു.
സിഫ്‌നിയോസിന്റെ പിന്മാറ്റത്തെക്കുറിച്ചുള്ള വ്യക്തമായ കാരണം എന്താണെന്ന് പുറത്തുവന്നിട്ടില്ല. അതേസമയം ഐഎസ്എല്‍ അതിന്റെ അവസാന ഘട്ടത്തിലേക്ക് അടുക്കുമ്പോള്‍ മികച്ച ഒരു താരം പിന്മാറുന്നത് ബ്ലാസ്റ്റേഴ്സിന് കടുത്ത തലവേദനയായിരിക്കും. സിഫ്‌നിയോസിന്റെ അഭാവം ബ്ലാസ്റ്റേഴ്സിന് തിരിച്ചടി നല്‍കുമെന്ന കാര്യത്തില്‍ സംശയമില്ല. താരത്തിന്റെ പിന്മാറ്റം ബ്ലാസ്റ്റേഴ്സ് മുന്നേറ്റ നിരയുടെ കരുത്ത് കുറയ്ക്കും.
അതേസമയം സിഫ്‌നിയോസിന്റെ സംഭാവനകള്‍ക്ക് ബ്ലാസ്റ്റേഴ്സ് മാനേജ്‌മെന്റ് നന്ദി അറിയിച്ചു. നേരത്തെ ടീമിന്റെ പരിശീലകനായിരുന്ന റെനെ മ്യൂളന്‍സ്റ്റീനും ബ്ലാസ്റ്റേഴ്സ് വിട്ടിരുന്നു.
കേരള ബ്ലാസ്റ്റേഴ്‌സിന്റെ ആദ്യ രണ്ടു കളികളിലും സിഫ്‌നിയോസ് പകരക്കാരനായിട്ടായിരുന്നു ഇറങ്ങിയത്. രണ്ടു മത്സരങ്ങളിലും ബ്ലാസ്റ്റേഴ്‌സിനു ഗോളൊന്നും നേടാന്‍ കഴിയാത്തതിനാല്‍ മൂന്നാം മത്സരത്തില്‍ റെനെ മ്യൂളന്‍സ്റ്റീന്‍ ആദ്യ ഇലവനില്‍ തന്നെ താരത്തെ പരീക്ഷിക്കുകയായിരുന്നു. റെനെയുടെ തീരുമാനത്തെ ശരി വെച്ച് സിഫ്‌നോസ് കേരള ബ്ലാസ്റ്റേഴ്‌സിന്റെ ആദ്യ ഗോളും നേടി.
Comments
Post a Comment